Kryeministri i Republikës së Turqisë, Binali Yıldırım, sot në qytetin turk Edirne porositi se në të ardhmen e afërt mbarë bota do të njohë shtetin palestinez dhe Kudsin Lindor si kryeqytet të tij, raporton Anadolu Agency (AA). 

Yıldırım iu drejtua qytetarëve në Kongresin e Partisë për Drejtësi dhe Zhvillim (AK Parti). Në fokus të fjalimit ishin zhvillimet e fundit rreth vendimit të shpalljes së Kudsit nga SHBA si “kryeqytet të Izraelit”.

Ai shtoi se Trumpit qartë i është porositur se gjërat rreth Kudsit nuk mund të zhvillohen në mënyrën “unë e kam njohur, gjë e kryer”.

“A është e mundur kjo të kalojë kështu? Jo. Presidenti Recep Tayyip Erdoğan tha: ‘Nuk e njohim vendimin tënd’. Të gjitha vendet islame, të gjitha vendet e tjera të botës ishin në unitet kundër këtij tentimi dhe e zmbrapsën”, tha Yıldırım.

“Në të ardhmen e afërt mbarë bota do të njohë shtetin e Palestinës, dhe Kudsin Lindor si kryeqyteti të tij. Në këtë mënyrë kjo çështje do të zgjidhet dhe problemi do të hiqet”, theksoi kryeministri i Turqisë.

– Yıldırım përshëndet rifillimin e shërbimeve të vizave SHBA-Turqi

Yıldırım gjatë kongresit tha se “çështja e vizave më në fund është zgjidhur”.

“Ne thamë se kurrë nuk do të jemi në anën e tensionit, mosmarrëveshjes apo konfliktit. Ne do të rrisim miqësitë tona, do të ulim armiqësitë tona”, theksoi Yıldırım.

Të enjten e kaluar, Ambasada e SHBA-ve në Turqi njoftoi rifillimin e shërbimeve të plota të vizave pas një pezullimi prej gati dy muajsh.

Sipas misionit turk në SHBA, në një lëvizje reciproke, poashtu edhe Turqia hoqi kufizimet për shërbimet e vizave për qytetarët amerikanë.

Më 8 tetor, ambasada pezulloi vizat jo emigruese për shtetasit turq pas arrestimit të një punonjësi që punonte në Konsullatën e SHBA-ve në Stamboll, duke nxitur një përgjigje ekuivalente nga Ankaraja./AA/